MARK. 15:33-41 (24/3/24)

# Ons nader nou vinnig die einde van nog ’n jaar se Lydenstyd.

En Lydenstyd is elke jaar vir ons ’n tyd om te luister na wat die Bybel ons leer oor Jesus se lyding ter wille van ons.
En Jesus het mos op baie maniere gely en verskillende mense mense was daarvoor verantwoordelik en het ’n aandeel aan sy lyding gehad.
Maar die diepste punt van sy lyding was natuurlik sy dood aan die kruis op Golgota.
Die gedeelte wat ons uit Mark. 15 gelees het, sê twee keer dat Jesus hard uitgeroep het daar aan die kruis.
Die ou Afrikaanse vertaling het gesê: Jesus het met ’n groot stem uitgeroep.
En dít wys sekerlik vir ons iets van die verskriklike pyn wat Jesus moes verduur: liggaamlike pyn, maar ook emosionele en geestelike pyn.
Hy het hard uitgeroep in sy verskriklike lyding aan die kruis – met ’n groot stem.

# Maar die gedeelte wat ons gelees het, gee ook vir ons heelwat ander besonderhede oor wat gebeur het terwyl Jesus aan die kruis gehang het.

So sê vers 33 van hierdie gedeelte bv. dat daar duisternis oor die hele land gekom het.
In die middel van die dag was dit skielik drie uur lank donker, van twaalfuur die middag tot drie-uur.
En wat sou dit beteken?
Duisternis of donkerte is soms in die Bybel ’n teken van God se oordeel en straf.
In Eks. 10 lees ons bv. dat duisternis die negende plaag was wat oor die Egiptenare gekom het.
En in Matt. 24 sien ons dat daar by die Wederkoms van Jesus ook ’n tyd lank donkerte sal wees.
So donkerte gaan in die Bybel soms saam met God se oordeel en straf.
En op Golgota was daar ook donkerte: die laaste drie uur voor Jesus se dood.
En dit was donker omdat God ook daar besig was om iets te veroordeel en te straf.
En wat was dit?
Dit was die sonde van die wêreld – ook u en my sonde.
En die Een wat daarvoor gestraf is, was Jesus.
Hy was die Een oor wie die donkerte swaar gehang het.
Hoewel Hy heeltemal onskuldig was, is Hy die Een oor wie die donkerte gehang het, en op wie die oordeel en straf van die Vader neergekom het.

# Maar om drie-uur die middag het die donkerte op Golgota opgehou.

In daardie stadium het Jesus hard uitgeroep: “My God, my God, waarom het U My verlaat?”
En hierdie woorde is ’n aanhaling uit Ps. 22.
En dis woorde wat wys watter verskriklike wanhoop en eensaamheid Jesus ervaar het.
Gewoonlik het Jesus in sy gesprekke, wat in die Bybel vir ons opgeskryf is, van God as sy Vader gepraat en Hom ook so aangespreek wanneer Hy gebid het.
Maar in hierdie oomblikke aan die kruis roep Hy: “My God, my God …”
Dit was asof sy Vader Hom verlaat het.
Dit was amper soos met ’n klein kindjie wat altyd sy pa se hand kan vashou wanneer hy in die donker gang na sy kamer toe moet stap.
Maar nou skielik is sy pa nie daar nie, en moet hy alleen in die gang afstap.
En aan die kruis het Jesus seker ook gevoel: Nou moet Ek alleen deur hierdie verskriklike donker gang van die dood stap.
Selfs my Vader het My nou verlaat.

# Maar dít is hoe ontsettend swaar Jesus vir ons gely het.

Dít is hoe Hy ontsettend swaar Hy aan die straf vir ons sonde gedra het.
En dit was so erg dat dit selfs vir Hom gevoel het asof sy Vader Hom ook verlaat het.
Maar dit wat Jesus vir ons gedoen het, is juis die blye boodskap van die Bybel.
Dat Hy alleen en met die uiterste swaarkry en lyding, tot die dood toe, die straf vir ons sonde gedra het, dít is die blye boodskap van die Bybel.
Want deur sy lyding en dood het daar vir ons verlossing gekom!
En daarvoor kan ons Hom maar net loof en prys!

# Nou, Mark. 15:37 vertel vir ons iets van die heel laaste oomblikke van Jesus se lewe.

Daar staan: “Daarna het Jesus hard uitgeroep en die laaste asem uitgeblaas.”
En op daardie oomblik toe Jesus sterf, het verskillende dinge gebeur.
’n Gordyn in die tempel, wat die voorhangsel genoem is, het middeldeur geskeur.
En volgens Matt. 27 het die aarde ook op daardie oomblik geskud, en het dooie mense uit hulle grafte gekom.
’n Hele klomp wonderwerke vind plaas.
En so kon almal op daardie dag sien dat God self aan die werk was.
Die soldate wat vroeër so met Jesus gespot het, en Hom aangerand het, en aan die kruis vasgespyker het, het bang geword en hulle offisier het gesê: “Hierdie man was werklik die Seun van God.”
En dis mos eintlik ’n geloofsbelydenis uit die mond van hierdie Romeinse offisier as hy sê: “Hierdie man was werklik die Seun van God.”
Dit was nie maar net ’n gewone mens wat hier gesterf het nie.
Dit was die Seun van God, want kyk net watter wonderlike dinge het nou hier gebeur.

# Maar wat sou dit beteken dat die voorhangsel in die tempel geskeur het toe Jesus sterf?

Die voorhangsel was ’n gordyn wat tussen twee dele van die Joodse tempel gehang het.
En dié twee dele is die Heiligste en die Allerheiligste genoem.
En niemand is toegelaat om by die Allerheiligste in te gaan nie.
Net die hoëpriester kon dit een keer per jaar doen, wanneer hy moes gaan offer vir die sonde van die volk.
Daar in die Allerheiligste deel van die tempel was God op ’n besondere manier teenwoordig.
Dit was die woonplek van die lewende en heilige God.
En daarom mag ’n sondige mens nie daar ingegaan het nie.
Maar toe Jesus sterf, skeur die gordyn voor hierdie plek.
En wat beteken dit?
Dit beteken dat die groot gaping tussen ons en God op ’n manier oorbrug en weggeneem is.
Die groot afstand tussen sondige mense en ons heilige God is op ’n manier weggeneem.
En dis Jesus se dood wat dit bewerk het.
En daarom kan ons nou met vrymoedigheid na God toe gaan.
Kan ons met vrymoedigheid voor Hom gaan staan, sonder om bang te wees.
Want Jesus se dood het die voorhangsel vir ons laat skeur.

# Wonderlike dinge het gebeur toe Jesus sterf!

Die voorhangsel skeur, die aarde skud, en dooies word lewendig.
En dit klink dalk vir ons vandag onmoontlik dat dooies op daardie dag weer lewendig geword het.
Maar dit wys maar net hoe groot die krag van God is.
Terwyl Jesus sterf, word mense wat reeds dood was, weer lewendig gemaak deur die krag van God.
En net enkele dae later sou Jesus self ook opstaan uit die dood, opgewek deur dieselfde krag van God.
So selfs op Golgota, waar Jesus gesterf het, selfs daar het die dood nie die laaste sê gehad nie.
Nee, dit was God wat die laaste sê gehad het, want Hy laat dooies weer leef.
Hy trek vir ’n oomblik ’n streep deur die dood en laat dooies weer leef.

# Maar kom ons gaan net weer terug na die donkerte wat daar was terwyl Jesus aan die kruis gehang het.

In die middel van die dag was dit skielik drie uur lank donker.
Maar miskien is daar vanoggend mense hier vir wie dit ook sommer in die middel van die dag donker is in hulle lewens.
Persoonlike probleme of huislike probleme maak dinge dalk vir u moeilik.
Dalk stry u self of ’n familielid of vriend teen ’n ernstige siekte.
Dalk worstel u met ’n verlies wat u moes ly toe iemand naby aan u deur die dood weggeneem is.
En dan is daar mos ook elke dag al die slegte berigte in die nuus, oor geweld en misdaad, en ongelukke, en politieke probleme, en korrupsie en bedrog.
So, miskien lyk baie dinge in ons eie lewe en in die wêreld rondom ons vanoggend vir ons net donker.
Maar selfs in die donkerste oomblikke van ons eie lewe kan ons terugdink en onthou: Jesus het self drie uur lank in die donkerte op Golgota gehang.
En dit was om te betaal vir ons sonde en probleme.
Dit was om lig in ons donker wêreld te bring.
In Joh. 8:12 sê Jesus juis: “Ek is die lig vir die wêreld. Wie My volg, sal nooit in die duisternis lewe nie, maar sal die lig hê wat lewe gee.”
En Jesus is ook vandag vir ons die lig vir die wêreld.
Maar eers moes Hy in die donkerte aan die kruis op Golgota hang.

# Dit wat Jesus gedoen het, het Hy vir ons gedoen.

Sy lyding was om ons te red.
En al is die wêreld in so baie opsigte nog steeds ’n donker plek, het daar vir ons nuwe hoop gekom.
Daar het vir ons hoop en lig gekom.
Want selfs in die grootste donker skyn daar ’n helder lig.
Bokant al die probleme van die wêreld en van ons eie lewens skyn die helder lig van Jesus se liefde en verlossing.
En Hy wil ons ook elkeen help in ons swaarkry.
Daarom kan ons elke dag in ons gebede al ons laste en probleme na Hom toe neem.
Daarom kan ons al daardie dinge wat ons so wil oorweldig, aan Hom oorgee en ook glo dat Hy weet wat om daarmee te maak.

# En kom ons herinner onsself maar nog ’n keer dat die voorhangsel in die tempel geskeur het toe Jesus sterf.

Ja, dat Jesus se dood vir ons die pad na ons hemelse Vader kom oopmaak het.
Die voorhangsel staan nie meer in ons pad nie.
Niks staan in ons pad nie.
Ons het nou vrye toegang tot die Vader.

# Vrydag is dit Goeie Vrydag.

Dan herdenk ons weer die dag waarop Jesus gesterf het.
En ons herdenk dit ook elke jaar in ons gemeente met die viering van die Nagmaal.
Die brood en wyn herinner ons dan aan al die gebeure van daardie dag: die donkerte, Jesus se harde uitroepe, die uitblaas van sy laaste asem, die voorhangsel wat skeur.
Die brood en wyn herinner ons dan dat Jesus se liggaam ter wille van ons gebreek is en dat sy bloed ter wille van ons gevloei het.
Kom ons kom dan op Goeie Vrydag weer hier saam om die Nagmaal met groot dankbaarheid te kom vier.
En kom ons kom dink wel aan die donkerte wat drie uur lank op Golgota geheers het, maar ook aan die Lig van die wêreld wat die donkerte kom oorwin het.
Soos Joh. 1:5 sê: “Die lig skyn in die duisternis, die duisternis kon dit nie uitdoof nie.”
Mag hierdie Lig, wat Jesus self is, mag hierdie Lig ook elke dag u en my lewe bly verlig, al probeer die donker hoe hard om dit uit te doof!

AMEN