“Die Woord word mens” (Joh. 1:1-14)(11 Des. 2022)

JOH. 1:1-14 (11/12/22)

# Matteus, Markus, Lukas en Johannes – dis die vier evangelies waarmee die Nuwe Testament begin.

En hierdie vier evangelies vertoon baie ooreenkomste.
Maar daar is ook sekere belangrike verskille tussen hulle.
Matteus en Lukas beskryf byvoorbeeld Jesus se geboorte redelik uitvoerig.
Hulle vertel van die engele en die skaapwagters en die sterrekykers en die geboorte in die stal.
Markus weer sê aan die begin van sy evangelie absoluut niks van Jesus se geboorte nie en sê net dat Jesus van Nasaret in Galilea gekom het.
En Johannes, die skrywer van die vierde evangelie, die man uit wie se boek ons vanoggend gelees het?
Hoe beskryf hy Jesus se geboorte?
Hy doen dit in een kort sin.
Hy sê in vers 14 wat ons gelees het: “Die Woord het mens geword en onder ons kom woon.”
En wat ’n vreemde beskrywing van Jesus se geboorte is dit nie!
Maar kom ons sê sommer reg aan die begin: Ons verstand sukkel maar om Johannes se beskrywing te verstaan.
Matteus en Lukas s’n is nog makliker om te verstaan.
Maar Johannes s’n is vir ons baie moeilik om te verstaan.
Want wat bedoel hy werklik as hy sê: Die Woord het mens geword?

# Nou, uit alles wat hier in Joh. 1 gesê word, is dit baie duidelik dat dit wel hier gaan oor Jesus se geboorte en sy koms na die aarde toe.

Daar kan geen misverstand daaroor wees dat Johannes hier wel van Jesus praat nie.
En Johannes noem Hom “die Woord.”
Jesus is die Woord van God.
Maar wat sê dit vir ons?
Ek dink ons het hier met ’n baie groot geheimenis te doen.
Maar kom ons probeer tog iets daaroor sê.
As Johannes praat van die Woord van God, sê dit een ding baie duidelik: God is nie net een groot stilte nie.
God is nie Iemand wat net swyg nie.
Nee, God is Iemand wat iets te sê het, wat dinge het wat Hy wil kommunikeer en wat Hy aan ander wil oordra.
’n Woord is mos iets waarmee ons vir iemand iets kan
Met ’n woord kan ons sê wat ons dink of voel.
Met ’n woord kan ons onsself aan ander bekend stel.
En dít is wat die Bybel van God sê: Hy is Iemand wat Homself aan ons as mense wil bekend stel.
Deur sy Woord wil Hy vir ons sê wie Hy is en hoe Hy is.

# Maar kom ons neem dit ’n stappie verder.

Ons gebruik mos almal woorde om te kan kommunikeer.
En daar is veral twee maniere waarop ons woorde gebruik: dit is wanneer ons praat en wanneer ons skryf.
Ons noem dit ook die gesproke woord en die geskrewe woord, ewe deftig!
En dit is hoe ons ons gedagtes aan mekaar oordra, en ook hoe ons onsself aan mekaar bekendstel.
En deur die loop van die geskiedenis het God ook albei gebruik, die gesproke en die geskrewe woord.
Hy het direk met sekere mense gepraat.
Ons lees daarvan op verskeie plekke in die Bybel.
Dink maar aan hoe Hy met Abraham gepraat het en vir hom gesê het dat Hy ’n verbond met hom wil sluit.
En hoe Hy met Moses gepraat het en vir hom die opdrag gegee het om die Israeliete uit Egipte te gaan lei.
So God het direk met sekere mense gepraat en Hy kan dit natuurlik ook vandag nog doen wanneer Hy dit nodig vind.
Maar dan het God ook sekere dinge laat neerskryf.
En so het die Bybel tot stand gekom.
So het ’n baie belangrike deel van wat Hy vir ons as mense wil sê op Skrif gekom.
En ons kon ’n klein stukkie daarvan vanoggend hier selfs in ons eie taal lees!
Maar nou, baie belangrik, God het Homself nie beperk tot die gesproke en geskrewe woord nie.
Vers 14 wat ons gelees het, sê: “Die Woord het mens geword en onder ons kom woon.”
So behalwe God se gesproke en geskrewe Woord is daar ook sy Woord wat mens geword het.
En dit is Jesus!
Jesus is God self wat met ons praat, God se mensgeworde Woord.
In Jesus stel God Homself aan ons bekend.
In Jesus wys God vir ons hoe Hy dink en hoe Hy voel en hoe Hy is.
In Jesus kan ons selfs in ’n sekere sin sien hoe God “lyk” – as ons hierdie “lyk” maar net in aanhalingstekens verstaan.
Maar ons lees mos dat Jesus in Joh. 14:9 sê: “Wie My sien, sien die Vader.”

# So Johannes beskryf in sy evangelie Jesus se geboorte op ’n unieke manier.

Hy sê net, kort en kragtig: Die Woord het mens geword.
En dít is waaraan ons in hierdie Kerstyd terugdink, aan die menswording van God se Woord.
Hoe onverstaanbaar dit alles ook al vir ons verstand is, die Woord van God het mens geword.
Jesus is gebore.
En daaroor is ons vandag so dankbaar en so bly!

# Maar nou is daar nog iets wat ons moet onderstreep.

As Johannes sê die Woord het mens geword en onder ons kom woon, beskryf hy daarmee nie net Jesus se geboorte nie.
Hy beskryf daarmee op ’n manier ook Jesus se hele lewe op aarde.
Johannes sê mos: Jesus het “onder ons kom woon.”
En dit beteken dat Hy werklik hier op die aarde kom leef het.
Vir ’n bietjie langer as 30 jaar het Hy kom ervaar wat ons ook ervaar.
En in dié tyd het Jesus ons aardse lewe met beide sy vreugde én sy hartseer geken.
Jesus was nie net kamma-kamma ’n mens nie.
En sy lewe hier op aarde was nie net ’n stuk oëverblindery nie.
Nee, die Bybel leer duidelik vir ons hoe eg menslik Jesus se lewe was.
Dink byvoorbeeld aan hoe Hy gehuil het by die graf van sy vriend Lasarus.
En dink aan hoe Hy in die woestyn deur die duiwel versoek is.
En dink aan hoe Hy in die tuin van Getsemané vir sy dissipels gesê het dat Hy doodsbenoud voel en dat hulle saam met Hom moet waak.
En dit is eintlik vir ons so ’n groot troos om te weet dat Jesus ook dinge soos hartseer en versoekings en benoudheid ervaar het.
En dat dit nie net óns is wat met sulke dinge moet sukkel en daardeur moet swaarkry nie.

# Jesus het regtig onder ons kom woon.

Hy was voluit mens.
Maar terselfdertyd was Hy dan ook die Woord van God.
En wat doen God se Woord?
Kom ons sê maar weer:
God se Woord sê mos vir ons meer van God self.
En daarom kon mense altyd in Jesus sien wie God is en hoe God is, en wat Hy wil doen en wil hê.
In Jesus kon mense vir God self leer ken.
Waar Jesus siekes gesond gemaak het en dooies opgewek het uit die dood, kon mense sien: ons God is magtig.
En waar Jesus sondes vergewe het, kon mense sien: ons God is vergewensgesind en genadig.
En waar Jesus aan die kruis sterf, kon mense sien: ons God wil ons red, en Hy wil nie hê dat selfs een mens verlore moet gaan nie.

# In Jesus is dit God self wat met ons kom praat het.

En dan is dit nie sy gesproke Woord of sy geskrewe Woord nie.
Dan is dit sy mensgeworde Woord.
1:1 en 2 stel dit só: “In die verlede het God baiekeer en op baie maniere met ons voorvaders gepraat deur die profete, maar nou, in hierdie laaste dae, het Hy met ons gepraat deur die Seun.”
God het met ons gepraat deur die Seun, sê hierdie vers.
God het met ons gepraat deur Jesus, sy mensgeworde Woord.

# Maar nou is die vraag: Hoe antwoord ons op God se praat met ons?

Hoe antwoord ons op sy Woord, en dan ook spesifiek op Jesus, sy mensgeworde Woord?
God se Woord vra ’n antwoord van ons.
Jesus vra ’n antwoord van ons.
En ongelukkig gee baie mense nie ’n positiewe antwoord nie.
Johannes sê juis in vers 11 wat ons gelees het: Jesus “het na sy eiendom toe gekom, en tog het sy eie mense Hom nie aangeneem nie.”
En die Bybel is vol verhale van hoe mense hulle nie aan Jesus wou steur nie.
Die Bybel is vol verhale van hoe mense vir Jesus verwerp en gehaat het.
Ja, van hoe hulle Hom selfs aan ’n kruis vasgespyker het.
Hulle antwoord op die Woord van God was ’n baie duidelike nee.
Nee vir Jesus!
Maar daarmee dan ook nee vir God.

# Maar ’n mens kan mos ook positief antwoord op God se Woord!

Jy kan mos ook ja sê vir Jesus, vir die mensgeworde Woord van God.
En hieroor het Johannes ook iets te sê hier in Joh. 1.
Hy sê in vers 12: “Maar aan almal wat Hom aangeneem het, dié wat in Hom glo, het Hy die reg gegee om kinders van God te word.”
Almal wat God se Woord aanneem, almal wat vir Jesus aanneem, almal wat in geloof ja sê vir Hom, kry die reg om kinders van God te word.
Hulle kry die reg om deel te word van die familie van God.
En dan is God jou Vader en jy sy kind.
En dan kan jy Kersfees werklik met groot blydskap vier, want dan weet jy: ek is ’n kind van God.
Ek het ja gesê vir Jesus Christus.
Ek het positief geantwoord op die Woord van God.

# Ons God is nie Iemand wat net swyg nie.

Soms voel dit dalk vir ons of Hy net stilbly.
Maar Hy is Iemand wat praat en kommunikeer.
En Hy het altyd iets te sê vir ons as mense.
Hy het altyd ’n Woord vir ons – soos dit ook weer vanoggend hier in hierdie kerkgebou die geval is.
En as ons dan in hierdie Kerstyd weer op ’n besondere manier voor Jesus staan, kan ons weet: ons staan voor die mensgeworde Woord van God.
Jesus is God wat met ons praat.
Jesus is God wat sy hart teenoor ons oopmaak en wat sê hoe lief Hy ons het.
En op hierdie Woord van God kan ons maar net hard en duidelik ja antwoord.
Ja, Here, ek het U ook lief.
My antwoord op u Woord is ja.
En met my hele lewe wil ek wys hoe ernstig ek my antwoord bedoel.
Met my gedagtes en woorde en dade, met alles in my lewe, wil ek wys: My antwoord op u Woord is ja!

AMEN