Ef. 1:15-23 (26/5/22)

# Ons vier dan vandag die hemelvaart van Jesus.

Voor die oë van sy dissipels is Jesus skielik van hulle weggeneem en het Hy opgevaar na die hemel.
1:9 sê: “Jesus is opgeneem, terwyl hulle dit sien, en ’n wolk het Hom weggeneem, sodat hulle Hom nie langer kon sien nie.”
En dis eintlik ’n baie ingrypende ding wat op daardie dag daar plaasgevind het.
Baie ingrypend, want Jesus was ná sy hemelvaart nie meer self liggaamlik en fisies op die aarde nie.
En die dissipels moes nou met hulle lewens voortgaan sonder dat Jesus langer sigbaar by hulle was.
Die dissipels moes nou ’n nuwe tydperk ingaan, die tyd ná die hemelvaart van Jesus.
En dit laat onmiddellik by ’n mens die vraag ontstaan: Maar wat is die betekenis van Jesus se hemelvaart?
Hoekom het Hy opgevaar na die hemel?
En hoe moet ons dink oor die feit dat Hy nie meer self sigbaar hier op aarde teenwoordig is nie?

# Nou, in die Bybel word daar baie duidelik oor die betekenis van Jesus se hemelvaart gepraat.

In verskillende Bybelgedeeltes word daar vir ons ’n goeie aanduiding gegee van hoe ons daaroor moet dink.
En ook in die gedeelte wat ons vanaand saam gelees het, word daar onder andere oor die betekenis van die hemelvaart gepraat.
Veral die laaste gedeelte van Paulus se gebed in Ef. 1 sê vir ons ’n hele paar baie belangrike dinge oor die hemelvaart.
So, wat is die betekenis van die hemelvaart?
’n Eerste belangrike ding is dít: Die hemelvaart wys vir ons iets van die mag en krag van God.
1:19 en 20 stel dit so: “Dit is dieselfde kragtige werking van sy mag wat Hy uitgeoefen het toe Hy Christus uit die dood opgewek en Hom in die hemel aan sy regterhand laat sit het.”
So, Jesus se opstanding uit die dood en sy hemelvaart word in hierdie verse in dieselfde asem genoem.
Hierdie twee dinge is albei tekens van die ontsaglike mag en krag van God.
En wie anders as Hy kan sulke dinge doen?
Wie anders kan iemand uit die dood laat opstaan en Hom ook voor die oë van ander mense van die aarde af laat verdwyn?
Net ons grote God kan dit doen.
Net deur ’n wonderwerk van God kon dit plaasvind.
En daarom is die hemelvaart van Jesus vir ons in die eerste plek ’n teken en openbaring van die mag en krag van God.
Ja, die hemelvaart van Jesus laat ’n mens klein voel, baie klein by die besef van hoe groot ons God is.
Sy mag en krag is selfs nog groter as wat ons ons kan voorstel!

# Maar dan is daar nog ’n baie belangrike ding wat in Ef. 1:20 vir ons omtrent Jesus se hemelvaart gesê word.

Daardie vers sê dat God die Vader vir Jesus “in die hemel aan sy regterhand laat sit het.”
En dit is mos ook wat ons in ons geloofsbelydenis bely.
Ons sê, in die Apostoliese Geloofsbelydenis: Ons glo in Jesus Christus “wat opgevaar het na die hemel en sit aan die regterhand van God, die almagtige Vader.”
En die regterhand van God is iets waarvan ’n mens sommer ’n hele paar keer in die Bybel lees.
In Eks. 15:6 sê Moses bv.: “U regterhand, Here, gedug in sy krag, u regterhand, Here, verpletter die vyand.”
En so is die regterhand van God ’n teken van sy mag en krag.
En as Jesus dan nou aan die regterhand van God die Vader sit, beteken dit dat Hy ook oor die mag en krag van die Vader beskik.
Dat Hy met mag en krag regeer, want Hy bevind Hom in die heersersposisie in die hemel.
Hy sit aan die regterhand van die Vader.

# Ons weet dat toe Jesus op aarde gelewe het, sy lewe ’n lewe van groot nederigheid was.

Ons sien dit bv. waar Hy Jerusalem op ’n donkie binnery, en waar Hy sy dissipels se voete was net voor Hy die Nagmaal die eerste keer instel.
Jesus het self ook baie uitdruklik gesê dat Hy nie gekom het om gedien te word nie maar om te dien.
Maar waar Jesus nou aan die regterhand van die Vader sit, het Hy weer ’n verhewe posisie ingeneem – die heersersposisie in die hemel.
En dit beteken natuurlik nie dat Jesus nie ook in sy lewe op aarde ons Koning en Heerser was nie.
Maar op aarde het Jesus ons vrywillig kom dien en vrywillig in ons plek kom sterf.
Hy het vrywillig ’n nederige dienskneg kom word.
Maar nou, ná sy hemelvaart, is Hy weer deur die Vader verhoog, en beklee Hy die heersersposisie in die hemel.
“Aan Hom het God alles onderwerp,” sê vers 22.

# So, Jesus se hemelvaart beteken veral dat Hy gegaan het om aan die regterhand van die Vader te regeer.

En hierdie feit, die feit dat Jesus regeer, is so belangrik dat die bekende Switserse teoloog Karl Barth gesê het: “Dit is die eerste en laaste ding wat ’n mens kan en moet sê oor ons lewens en oor die wêreld.”
Dat Jesus aan die regterhand van die Vader regeer, het Barth gesê, is die heel belangrikste ding wat ’n mens kan en moet sê oor ons lewens en die wêreld.
Niks kan vir ons uiteindelik belangriker wees as om te weet dat Jesus regeer nie.
Dat Hy Koning oor alles en almal is.
Niks kan vir ons belangriker wees nie, want as Jesus regeer, dan is daar mos niks waarvoor ons as sy kinders bang hoef te wees nie.
Dan is alles mos onder beheer, selfs al lyk dit miskien dikwels vir ons asof alles juis nie onder beheer is nie.
Alle magte en kragte, of hulle goed of boos is, staan uiteindelik onder Jesus se beheer.
En dít is wat Jesus se hemelvaart vir ons wil sê: Ons het Iemand in die hemel wat oor ons lewens regeer.
Ons het Iemand wat oor hierdie deurmekaar wêreld van ons regeer.
En daardie Iemand is Jesus wat aan die regterhand van die Vader sit.

# Nou, natuurlik is dit vir ons moeilik om te verstaan HOE Jesus presies oor ons wêreld regeer.

Hy het bv. nie gekeer dat daar nou weer ’n tweede keer groot vloedskade in KwaZuluNatal kom nie.
En in Februarie het Hy nie gekeer dat Rusland die Oekraïne inval en dat dit tot groot lewensverlies en verwoesting gelei het nie.
Dit lyk of Hy nie met mag dinge in die wêreld laat gebeur nie.
Hy regeer niet met mag, soos aardse leiers nie, maar met liefde.
Hy dwing ook nie mense om Hom as Koning te aanvaar nie – Hy nooi ons uit om dit te doen.
So, daar is baie wat ons nie verstaan omtrent hoe Jesus oor die wêreld regeer nie.
Maar as gelowiges hou ons daaraan vas DAT Hy regeer, en DAT die Vader alles aan Hom onderwerp het, soos Paulus hier in Ef. 1 sê.
En dit troos ons om te weet: Hy regeer!

# Nadat Jesus na die hemel opgevaar het, was daar sekerlik ’n groot gemis in die lewe van sy dissipels.

Sy volgelinge het sekerlik moeilik van Hom afskeid geneem.
Maar later moes hierdie volgelinge ontdek dat dit eintlik ’n goeie ding is wat met Jesus se hemelvaart gebeur het.
’n Goeie ding, want Jesus sou ook nou op ’n nuwe manier oor sy kerk regeer.
Hy sou nou aangestel word “as hoof van die kerk,” soos Paulus dit in vers 22 stel.
Jesus sou na sy hemelvaart nie net so in die algemeen Koning oor die hele wêreld wees nie – Hy sou ook in die besonder die “hoof van die kerk” wees.
Toe Hy nog op aarde was, is Jesus mos deur die godsdienstige leiers van daardie tyd verwerp.
Dit was juis die mense van die kerk wat Hom vervolg het en wat die lewe vir Hom baie moeilik gemaak het.
En dit was op hulle aandrang dat Jesus aan ’n kruis vasgespyker is.
Maar nou, ná Jesus se hemelvaart, is al hierdie vernedering iets van die verlede.
En nou is Jesus aangestel as hoof van die kerk.
Hy is die hoof van almal wat Hom as hulle Verlosser aanvaar.
Hy is die hoof van almal wat deur sy bloed losgeloop is uit hulle sonde.
En so is Hy ook vanaand die hoof van Paarlberg-gemeente en elke ander gemeente van sy kerk op aarde.

# En hierdie punt is só belangrik: Hemelvaart beteken dat Jesus vanuit die hemel oor sy kerk en die gemeentes van sy kerk regeer.

Dit is nie ’n pous of ’n moderator wat hoof van die kerk is nie.
En dis nie sinodes of kerkrade of predikante of lidmate van die kerk wat die laaste sê in die kerk het nie.
Daar is net een hoof van die kerk en dit is Jesus.
En daar is net Een aan wie ons in laaste instansie gehoorsaam moet wees, en dit is Jesus.
En deur sy Woord gee Hy sy opdragte aan ons.
En deur sy Gees lei Hy ons om die waarheid van sy Woord te kan verstaan en om daarvolgens te kan optree.
Ongelukkig is ons mos net nie altyd bereid om sy wil te soek en ook te doen in die kerk nie.
En dan wil ons kerk wees soos dit óns pas, in plaas daarvan dat ons die leiding van die Here soek en volg.

# Die hemelvaart van Jesus is vir ons ’n baie belangrike gebeurtenis om oor na te dink.

En die hemelvaart is ’n gebeurtenis met ’n ryk betekenis.
Maar nou is dit belangrik dat ons vir onsself moet vra: Wat moet ons reaksie wees op die boodskap van die hemelvaart?
En hoe behoort die boodskap van die hemelvaart ons te raak?
En dan dink ek moet ons heel eerste sê: Die hemelvaart van Jesus moet ons opnuut laat besef dat Jesus die Koning van die hele wêreld is.
Ons moet opnuut besef dat Hy ook op hierdie oomblik aan die regterhand van die Vader sit en oor die hele wêreld regeer.
En al lyk dit miskien dikwels asof die duiwel eintlik oor die wêreld regeer, mag ons nooit glo dat dit wel die geval is nie.
Die duiwel doen wel vreeslike dinge.
En mense doen ook vreeslike dinge aan mekaar.
Maar uiteindelik is daar net een Koning en een Heerser, en dit is Jesus.
En Hy sal ook, volgens Op. 20, op sy tyd finaal met die duiwel en al sy bose magte afreken.
En dan sal almal moet erken dat Jesus alleen Koning oor alles en almal is.
Dat Hy alleen regeer aan die regterhand van die Vader.

# Maar ek dink daar is nog iets wat ons moet sê oor ons reaksie op die boodskap van die hemelvaart.

En dit is dat ons altyd moet onthou dat Jesus die hoof van sy kerk is en dat die kerk sy liggaam is, soos Ef. 1:23 dit stel.
Na Jesus se hemelvaart is ons nou as ’t ware sy oë en ore, en hande en voete, en mond op aarde.
Ons is sy liggaam waardeur Hy sy werk op aarde wil doen.
En daarom rus daar na die hemelvaart ’n baie groot verantwoordelikheid op ons almal se skouers.
En daar is werk wat elkeen van ons moet doen, want ’n gesonde liggaam is tog iets wat aktief besig is en wat kan werk as dit moet werk.
En net so behoort ons as die liggaam van Christus aan die werk te wees oral waar die Here ons wil gebruik.
En daar is so baie geleenthede vir ons om sy werk te doen!
Waar mense bv. in nood verkeer – armes en siekes en bedroefdes en eensames.
En waar mense die Here se Woord van verlossing en genade nodig het.
En waar mense moed verloor het en hoop verloor het.
In al hierdie gevalle, en nog baie meer, wil die Here ons in sy diens gebruik en moet ons as sy kerk ook sy lewende liggaam hier op aarde wees.

# Die boodskap en die troos van die hemelvaart is veral dat Jesus regeer!

Hy regeer elke oomblik oor die hele wêreld, maar in die besonder ook oor sy kerk en oor die lewens van elkeen van sy kinders.
Hy regeer, en daarom hoef óns niks te vrees nie!
Hoe sê Paulus nou weer?: “Aan Hom het God alles onderwerp.”

AMEN